A EDUCACIÓN E A CULTURA constitúen un elemento esencial na dinámica dos pobos polo que significan de reflexión, pensamento e revisión crítica de certezas, teorías e crenzas, o que nos debe levar a sermos máis prudentes e máis libres. A cultura beneficia a todos. Ao revés do que sucede nun evento deportivo –no que inevitablemente hai sempre un derrotado– na cultura todos gañan, todos gañamos.

Desde esa conciencia do necesario fomento da lectura e a escrita, Medulia Editorial convoca o Premio de Poesía Eduardo Pondal, que se resolve anualmente coincidindo co Día das Letras Galegas.

A figura de EDUARDO MARÍA GONZÁLEZ- PONDAL ABENTE (1835-1917) eríxese senlleira entre os poetas do seu tempo, constituíndo na actualidade un referente de primeira orde, cabo de Rosalía de Castro e Manuel Curros Enríquez, o trío máis célebre e influente da nosa literatura.

PONTECESO ten a honra de ter sido o seu berce, conserva a casa natal e mantén viva a traxectoria humana, vital e literaria de don Eduardo, íntimamente vencellada á súa terra, á súa historia e á súa paisaxe orixinarias, como o demostran as numerosas citas e alusións que salfiren os seus versos. Pondal é, pois, patrimonio esencial de de todas as galegas e galegos.

O Premio de Poesía Eduardo Pondal contribúe a manter viva a súa memoria e a descubrir novas autoras e autores, continuadores do seu legado e, por ende, enriquecendo o noso patrimonio literario.