Jose L. Graña Muiño naceu en Cerdido (A Coruña) no ano 1955. Profesional do ensino, destacou ao longo da súa traxectoria pola implicación activa en iniciativas escénicas co seu alumnado, promovendo actividades como contacontos, recitais poéticos, monólogos e representacións teatrais.
A súa produción literaria abrangue diversos xéneros e temáticas. É autor do monográfico Cerdido: lingua e outras realidades, unha obra centrada no seu concello natal, así como da novela Converxencia na cor vermella, que afonda nos efectos socioeconómicos da reconversión naval nas décadas dos 80 e 90 en Ferrolterra. No eido teatral publicou Itinerario do botellón, unha proposta reflexiva e humorística arredor do fenómeno do botellón, e Recortes de risa, conxunto de pezas breves de carácter cómico.
No ámbito da narrativa breve, publicou A vida é dura antes dos 18, relatos que revelan o complexo mundo interior da adolescencia, mentres que no campo poético é autor de Verso plural, poemario de estilos e temáticas diversas pensado para o desfrute familiar. Ademais, realizou a adaptación teatral de Mar adiante, obra narrativa homónima da escritora María Victoria Moreno.
A súa obra caracterízase pola vocación didáctica, a crítica social e o compromiso coa cultura e coa lingua galegas.
MEDULIA, editorial galega, privada e independente.
meduliaeditorial.es by 15114.net © 2025 – Tódolos dereitos reservados
